LANGTHING DIRGONGHA (Hangslikma)

LANGTHING DIRGONGHA

   (K C Bodo)

 Lanthing dirgong Dimasarao

Haphlai khaisa mailaba.

Hajadisa haphaila khaisa

Hadi dangne gathaya

Hadisarao dangladu

Dimasarao begreng jidu

Songba thaoya ramphadu

Hadisarao bahain jidu

Dedao phongdao jaladu

Hadi maihi maigiri

Khunsa danghi ri giri

Wayung donghi seb giri

Thuliphongkhe dainringya

Yaolai danghi thao giri

Waling donghi yam giri

Naga hoja nujaya

Yamsa hoba silingne

Naga pharai girikha

Yamjalang yamsa nuyakha

Phamibarjang radaolai

Dini hoba ringyakha

Jalang  gisib maiyakha

Hathaisase barailaidu

Dimasarao hojenba

Hadidisarao hodaiba

Daokha phorong baijada

Madar gimin maijida.

Soirathine wa wainsi

Gani lindu ramphadu

Maising gajaang rigiri

Sola giji thumaidu

Dimasarao gamadu

*******

Lanthing dirgong ansarao

Phorikhoha phuriya

Nolai rijing daobaidu

Phadaihabo thangphaya

Madab basa rikhbaidu

Daothu basa gaobaidu

Hadurijang didabjang

Basao phuslu slu.

Maising daindo dugruya

Jalang daindo rigainya

Mithi Marsi basathi

Goronbajang mithiya

Laisi ringma nangjaoya

Buma Bupha naisoya

             ******

Maithai phorong election

Sebra saosi delangdu

Nolai dangkhalai thangladu

Sainsi gede maijidu

Gari bobra jaladu

Haflong haju gakhudu

Raji naikhu thaoladu

Dongssmai donglaiba lugurao

Khabaihi nairikhhi dongkhade

Minihi degaohi thangladu

Olai gedema jayarao

Khanabaa khamaoni ariya

Dimarajikhe horangkho

Dimasaraoke  yungsusa

Olaise baorene thirene

Olaining baokhade gedebo

Saainside hojase jamaire

Sainside yungsusa baojare

Somai laikha thikhaning

Sereba khamphai sejaore

Misibo mojosa japhinre

Mosobo misini bugurkhe

Bakhalba basainha slaore

*********

Maithaibiri maithaiwa

          Laikhaning

Melma melsa jamkhaning

 Rajiha laisaba bangdaodu

Nolai bijingha gablaidu.

Phagun jaistriha giphindu.

Waireb gonsi phanangkhaning

Dini muluk khamakha.

Laisabakhe musuya

Laisabakhe hamya thiya

Dimasarao rajirao

Laisanakhe dabangri

Dimaraji dakhamri

Bokhese mungridao thilaba

*********

Rajnithikh politikhs

 Rajikhoha namu khurmu

Daphulungthujang jaolai dainlai

Aphnaniha no gaya

Jaba hongba nailaiya

Olai dini jalaidu

Dimaraji gubrudu.

Daoya gongigini jaokhase

Baryungma barhamya phaikhabo

Nojuma nogoiya dongphuba

Daoya gongsijang dangyaba

Dima rajini nojuma

Barsiri barsibkha thikhaning

Nojuma goilangma giphipma

Bokhede diniha baolaiya.

Dini langthing dirgongha

Hagrasani honggarya

Sugathaijang badailaidu

Khaiba deya thamsijang

Jarni yega wikhaoladu

Dongpharangphuya jipharangphuya

Sariphangha garadu

Naiju burun waibaidu

Sigarirao rikhsaidu

Nalendrase deriba

Sugathaibo lathuwa

Honguwaryabo hamdaoya

Langthing dirgong hamdaoya

Dimaraji hamdaoya.

********

Halaodao basa hajaiba

 Longlab daoni dainbainthane

Langthing balaiha narimba

Drang nolaiha semsaoba

Johayabo jophaiba

Halodaoni haganthi

Wainbangmani diganthi

Johayani rijabthai

Langthing dirgong Dimasarao

Dini mathao phuyakha.

LONGLAIMA HAJUHA (Hangslikma)

LONGLAIMA HAJUHA

   (K C Bodo)

Longlaimani Dimasarao

Baraimaha narimba

Maibangmaha Digarba

Ronya basa hamaliba.

Longlaima hajuba majangba.

Rajirao maijiba mailingba.

Longlaimani pharaphang

Sinja debsi thangkhabo

Sainjro debsi gaokhabo

Yader made maodaoya.

Bedeb rijing dongbani

Dao rijingbo githimba

Jalang sainyung dungkhabo

Pharaphangkhala khamdada

Longlaimani mathlarao

Serge khunbar phereba

Khamphlai phanthi sablaiba

Saisong jenter khunluba

Jeng golong mander khunruba

Gisimlaijang khungaba

Gurmu gisim khunbangba.

Maising daindo laokhabo

Horsing horlao gajangkhabo

Lali baido dongbani

Daindo baido jamthaoya

Aju adai khamhaya

Aju horsing yamhoba

Disingbaha khamlaine

Gede phaiba yamriba

Yamha gili yamdongba

Aju dophang gairiba

Adai horsing ridaoba

Khailim gablai rdongba

Rimi  rimi wainsoba.

*****

Longlaima pharaphangdongkhali

Baryungma barhamya phaikhabo

Rungphangsa bondebha nangyamu

Longlaima pharaphang girikha

Barsri barsra sibkhaning

Bongphangsa bondebha barnangdu

Longlaima raji gubrukha.

Daokha yamsa barlangkha

Daoling daoma kheblangkha

Diniha sainklim girikha.

Mathalraobo khamykha

Khun yaokhrai rennebo

Daoma daosa khanebo

Khun gather maiyakha.

Jini khailim jigaokha

Bisikh rigu phainjikha

Rigu giri sari gainkha

Lali waido girikha

Maising khamne maiyakha

Basa serge dainkhribkha

Maising gajang bonsaokha.

Gandhi phaihi  nuphaiyaba

Andulon ha nangjaoyaba

 Dimajikhni daothai luthai’

Dini gamarikh gamakha

HANGSLIKHMA (4)

Diyung Dirgongha

   (K C Bodo)

Mathai rijing raja Jiba

Dilaonarha dongbuba

Malaijangbo lonjaoba

Dimasarao dongne ringya

Jarni nokhe dangkhalaikha

Jarni hakhe sejaokha

Diyung narha thaophaikha.

Haju harang donphaikha

Haphai hamba jini raji

Dini jakha malaini raji

Malai ringkha girikhkha

Jing gibir thaolakha

Dini malai maijidu

Jing rainghi dongmaidu.

********

Nolai masiha thiyasi

Dinibo dongma baoyakho

Noma thonkharao gaiyakho

Dimasani thonkharaojang

Malai thongkharao gailadu

Diyungnarni Dimasarao

Nolai hamsi khayakho

Bari khaba jenyakho

Thaiju thaiphulung gaiyakho.

Maithai phindu jaibaidu

Dimasaro gamadu

*******

Diyungbrani lisgrini

Thongaphangbo gabaodu

Hading jangse khorongkhaba

Malai nuhi gamangba.

Hariphajang harimba

Diyung dirgong khundangba

Diyung dirgong mailuba

Gamariphanag rungdainba

Dusampharaijang sikhlaiba.

Diyung dibu rung jaoba

Baithasa muthimji

Yaoha giliba.

Diyung dibu rungjaone

Jaoring daojang haripha

Dini bara thanglakha?

Garao Dima rijabne

Harimakhe nuyakha.

Diyung Dirgong Wathibondo

Sainsi baiya rijing rijing

Daindu malai masaidu

Malai bajiha langladu

Rangkho rikho bojaidu

Diyung dibu garadu.

Diyungbraha yaokharai dangkha

Lama jaokha no dangkha

Makhao mithim gablaikha

Dimaraji luphibkha.

Liz girini garaothai

Jaoring daoni rijabthai

Dini rikhi maiyakha

Dimasarao gamakha.

Dimasarao baburao

Jadi nangya mulukh nangya

Laisigurse nangjaoba.

Laisi gurjang bongphangjang

Dini salai jilaidu

Aphnaraokhe dangklaihi

Burung khasi bittle gajao

Jujang thiyung jaoridu

Dirgong mogong saoridu.

Counchilne ribatha bangdaohi

Makahaorao phongphaosi jiladu

Dimasarao gejesi

Hagong danghi Jiyarao

Hading ragai dongyarao

Naikhu rainpha dongladu

Sain raonang ha raonang

Hadi hanang bel bel

Sam barma bophrijang

Dubri yader bithibjang

Hadunang duphuya

Sam phinang phiphuya

Sainsong danghi maijiya

Horsong daohi main gainya

Dimasarao japhaidu

 ******

Dini malai bangphaidu

Longlai makhe jikhphadu

Lamsakhongkhe jikhphadu

Nolai rijing dimasarao

Diyung dirgong dongbakhe

Dini balaodu.

Dimasani jarimin

Gamarikh gamadu.

Lizgirijang jaoringdao

Laosadaojang longbangdao

Hariphajang harimani

Bisai barja birbaidu

Mudi Diyung Gajaodu.

Dimasarao nailaiya

Dimajikhrao smaiya

Ringyaraobo rebkhuya

Yader Dima gukhurdu

Jing gibir thijaodu

********

Digejer longthaima dongkhali

Diyungma Dibaola dekhabo

Digejer longthaisa maoyamu

Digejer longthaima girikha

Diniha malai dokhribkha

Disri disra phaikhaning

Digejer longthaisa gajaodu

Diyung dirgong Dimasarao

Jamdao Jamdao jamphaidu

Diyung dibu Diraindu

Na gune wari giri

Bon daingne bonphang giri

Diyung dirgong hajengkhong

Khusong bidi Diyakha.

Diyung Dibu longthailing

Sisong hone maiyakha

Dini Jarikh Japhaidu

Bokhe Nuhi Khabaidu.