Tuesday 17 March 2015

SUPHIN (Hangslikhma)



 SUPHIN
   (K C Bodo)

Engraji 1947 maithaini
August badainni sainjrakhali
Sainjagedeni magusarao
Suphin masi maibane
Bom saoba hilai gaoba
Khajbane minibane
Bonjuphangni daijagadain
Suphin damma mijingkha
“ Gegong rili rili gegong nabong
Soroina ajang soroina
Lele ganja le
Phoisa riha phisa”
Khamphlai khami damdadakha
Samtho khamhi dambukha
Malang gahi damkhakho
Khimjumaha sohikha
Suphin barhi birlangkha
Magusarao thogijaokha
Naikhu gamang thaolakha
Gejeside riyamu
Magusa langkhao ribani
Buthujang thaibai khujakha
Hangar bongr khaibaihi
Darna pharna golangkha
Magusa khaoda jadada
Dinibo saojang thaolakha
Daoja gadaima longkhorha
Suphin damkha khajakha
Magusarao khabaikha
Suphin sene magusarao
Masi masi gakhukha
Thogo  muthai sukhaojaokha
Magusa gana jatharkha
Magusa damber thaydao
Bonphang gaphuya dongyaba
Gana jaya dongbamu
Suphin baraha nudumu
Khurmu hamya sobani
Bongphang gama gaphuya
Naikhu wainmu nanglaba
Daojagadai khikhlahadu
Magusarao ganarao
Gurudithihi slaojidu
Smu jidu nulaya
Daojagadain sididu
Brandi thihi linglaidu
Magusa damber gamangdu
Daji thiba khanaya
Daling thiba khmao haphya
Daokhikhening sejilaidu
Sidikhening selinglaidu
Magusarao sulaidu
Sajaohi sereba garadu
Minimathi garaphama
Magusa damber gamangdu
“ Buhase mungridao thilaba
Malaithayahon thaokhabo
Yahonthao thikhabo baijaga
Sibrai khlim muli yaowai
Gana hamma muthai numa
Daokhikhedi ningjiba
Sidikhethi ning lingba
Jarbo naihi nulama

·         * * * * *
Suphin baraha dini dong
Bukhe nuhi buthujang
Daoja gadain rikhlaima
Bonphang bohi dainkhaohi
Jini suphin labuma
Jarni suphin damlaihi
Khaja khaja bailaima
Jini hakhili majangma
Jarni sindai birrima
Left right left.

THAIRE PHINSINI GAYASANI (Hangslikhma)



THAIRE PHINSINI GAYASANI
   (K C Bodo)


Thaire phinsini gayasani
Damrakhorha thangyasani
Haju haphalai dongbasi
Dimaraji bangbasi
Dilaonarni haju daikho
Halalini hajenggajao
Dilaobrani phradesari
Airikhidimani Dithani
Halodaoni haganthi
Longlabdaoni longrangkhe
Dimapurni raja nokho
Maibangbani semyambro
Sainyaderni sindaikhe
Bhuban haju sibrai daikho
Sombodonni yagainkhe
Khilimhi philihi naimamu.

·         * * * * * *
Mungridao rarhikh raphaidu
Jengkhong gonrikh gongphaidu
Khanai phurikh phuphaidu
Munggridao bisilai dongmakho
Mungridaoni khurmu hamya
Gari giri bara giri
Khaha baoba jayahining
Aphna hainthi soyahining
Adung ajang nuyahining
Phorikhoha buthusijang
Garao dima phoribakhe
Thanghi dongbaha nuyaohining
 thaire phinsi gamakha
thaphala haduri jamakha
Bamindrijang giphinmakha
Rimi rimi baolahi
Sainsong hangma sikhlaba
Horsing mudi rulaba
Mungridaosening niyakho
Jinglugu saobasi jubaosi
Dimasa bangbasi dongbasi
Olaining dambra gamaima
Bokhebo baolahi khabaiba
Thaire phinsini gakhali
Giphinya waremai giphinnang
Gajaoya digalao gajaonang
 Waremaijang giphinkhabo
Dimarajiha giphinnang
Digalao gajaokha thikhabo
Dima dibuha gajaone
Madaikhe bigasni bilaba.

THONGKHARAO (Hangslikhma)



THONGKHARAO
   (K C Bodo)

Bonphangbo dekhusai dekhuba
Nokhasao naikhuhi dekhure
Nokhasao sonangthi baolaba.
Yaderma baraha od giri
Sububgbo jalai sangaba
Hakhe naikhalaya himlaba
Garani garaokhe khanaya
Jarkhening girkhdao baolaba
Saindide rarikh raphaima
Saindide thairesao gamaima
Bokhede alangsi baolaya
Bongphangde nokhasao sophuya
Maithaijang rajasi dongkhabo
Bosokhe thikhlai thibase
Yaderma singli jobase
Bonlebphong yaderha thipkhali
Thibani maithaisi gidingya
Horima jitharre saotharre
Yaderha singli jokhabo
Sinaru thongkhraode thongsuibi
Thibani yahonha thijaore
Nomani thongaphong gaijaore
Subungbo nokhasao maisoya
Sainside rarikh rammase
Sainside saingili jomase
Adungrao saingili jokhabo
Ajangrao thairesao gakhabo
Dimasa thongkharaode thong hambi
Dimajikh thonkharaode thong suibi
Olaise thijaoma mijingba.

Nailangma Misingdu (hangslikhma)



Nailangma Misingdu
   (K C Bodo)


Saosini bilding dongbakhe
Ginini miyung bangbakhe
Saosi jiphaohi gababa
Haphlaini hurai rajalai
Phongphaohi rogonbai donglaba
Sereba phinrijing phinlaba
Sereba maiphinya gajangba
Sereba ringasni ringlabasereba o a thiringya
Hagraha giphiphhi donglaba
Bokhede nailangma ang thiya
Adungrao haba jenlaiba
Noyamni jabaikhe sibkhaohi
Jadini r cc no dangba
Bumakhe ragaohi dengbakhe
Mahuni garao hadaibakhe
Phorikhoha buthusijang
Garao dima phuribakhe
Ajangrao daophang khambakhe
Risha rigusa sengbakhe
Rih riminsa khonbakhe
Adurao khamsmai khamlaiba
Ajangrao khasaohi donlaiba
Maibakhe ronlaihi jilaiba
Daobakhe ronlaihi gainlaiba
Mungridao nailangma mijingba.