HA-WARYA BAHA (hangslikhma)

HA-WARYA  BAHA

   (K C Bodo)

Hasao raji hagarhi

Maibang makhe dangkhlaihi

Dimaraja thanglaba

Hawar raji thaohiba.

Dimasarao khabaiba

Maibangmani rijabthai

Dini sosi thaolaba

Hawar raji ha warya

Dimasane ha thikhya

Dimajicne nothikhya

Hawar rajini Dimasarao

Ran idol dev idol

Dolma dolsa dol dol

Hamhi dongba sainkhali

Busumakhe amai amai

Bahaokhebo abai abai

Mama mama baba baba

Gilim gasa jakhali

Riya yamha galaikhali

Buphani risa sukhaoya

Bumani rigu suthaoya

Bumani khojong rothaoya

Bumani longkhaidu horthaoya

Dini bigan jughabo

Devi thihi baobakhe

Raja thihi thangkhabo

Rani thilai dongbakhe

Nuhi mungridao gamangdu

Ha guwarni Dimasarao

Bamin khirton dong dong

Khring khrang bring brang

Madai rikhlaibasene

Khirton jamkhathikhaning

Madai Dima longsingdu

Daikho daiya yaowaidu

Dimasani madaila

Khamdadathida dongmabo

Songdadthi khaimabo

uju muju janaidu

Mungridaobo gamangdu.

*****

Krishnachandra Dimaraja

Bamin labu dengphaikha

Munglaijikhkhe habrikha

Govind Chandra Dimaraja

Bubaojikhe dangjikha

Bamin khorong habrikha

Hadisakhe longbukha

Thurusakhe dongrikha

Tularamkhe rikhlaikha

Govind Chandra gamara

Gombir singjang dainjaokha

Basa giri basic giri

Bongso giri gamakha

Dimaraji khamakha

Alu mudim thumaisi

Nojor mojo longkhorha

Kashi ode bridabonni

Dorma yaowai dongyaba

Puja khalaibai jiyaba

Dimajickhe dangjikha

Dumkhuha raji khakha

Dimasade Thiladu

Garaodima Joyakha

Dimajikhkhe khamakha

Dumkhoni Dimasrao

Malaijang buhase thijaoba

Daokha daodain jaslingba

Dimasabo thiphuya

Bangalibo jasoya

Jedangmalai linglanglang

* *

Dimaraji thiladu

Nolai bumu thaligram

Dikhong Dima Baoladu

Longkhao bumu slaihi

Dini dengkha srinodi

Haju Dima thilaidu

Sibrai daikho baoladu

Laisihade rebmaidu

Bhuban paharse

Jiri  digni dijao longkhao

Senai ode jathinga

Dimasarao dirgong dongkho

Ada abi girikhbi

Adung Ajang majangbi

  Laisi laibra ringsmaibi

Narowai naiba balaibi

Garao Joba Khanaba

Jailam khailam khiphailam

Khamao mraao ang haphya

Gari ticket khatihi

Phaiphinlama mijingdu

·         * *

Kharam muri khanaya

Baibahabo dingthang khithang

Thibahabo dingthang khithang

Khide thanghi thangdaoya

Dimasarao hamdaoya

Maimu tharba naibade

Garakhjiraobo makham gardu

Githinethidu danglkaidu

Baminraobo khalai baodu

Jarne thihi langladu

Khalai langi jayakho

Jadi jadi landukhu

Gakhir lindu ghi jidu

Baminraoni bithlim hamdu

Basa basikh laisi ringdu

Dimasani rangjang rijang

Bamin ganang jaladu

Malai bahain jiladu

Dimasarao begreng jidu

Dimasarao rainphadu

Khanai subru Dimajikhrao

Buma buphakhe klimya

Baminraoni yega rimdu

Bilibhi khilimdu

Bokhe nohi gamandu.

* * * *

Jukhubakhe nubukha

Khunjohase gidingdu

Sereba sari gainbaidu

Sainbili juga rilaidu

Rigu gainba nukhade

Malai phaiba ang baodu

Jadini khusi dangbahala

Melma melsa khambahala

Malaila smu phaima nangba

Bokhe nuhi gamangdu

Khajang thamsi baigodu

Garamabo mijingdu

Musubabo niyamu

Hamjao yabo jayamu

Malaini jathai jabudu

Malai thimhi naiphaidu

Dimasarao khiyal khalaiya

Teb record photojang

Suguhi bonsi langladu

Sagangha thiya yahonha thidu

“Basha nai kristhi nai

Raja gelo desh gelo

Aj thara sorbohara

Ar kishu nai”

Olai malaijang diniha

Muluk gablai baijaodu

Danghi giri thijaodu

Bokhe khanahi lazidu

Khaju gili khabaidu

Basa saosi bupha rijing

Jadi masi dara rijing

Serekhe bopha thijennang

Hasao hawar demra raji

Hamri ode dijuwa

Jadi masi bumu masi

Dara masi khaikhophuya

Madai masi yaowaiphuya

Jarni madai smai ringya

Khajang maya nanglaiphuya

Khusi mungsi danglaiphuya

Lama masi himlaiphuya

Dimasa masi Dimasa pharsi

Khujang thidu balaodu

Barjang baosi giphindu

Dimasarao gamadu.