Maimu ( Part-I) By K C Bodo

                         Maimu

                         (part-1)

Mahoni graokhe rikhihi            riya niya manphain rikha

                             Maiya niya jing maikha,

Dimajicni hamjaoma              Dimajicni khasaoma

                                A’bu maimu Dima.

Dimasarao Dimajicrao         riba abu maimu khunmu

                                Buthusini se,

Khasaomani yaosandide          dini sainsi ribanide

                            Sainsi maimase.

Haha diha saoraya                waiha barha gamaya

                         Giding giding phaimase.

Lonthai diha galangyasi           Dimai diha gilikhyasi

                                       Abu gibise.

Jalang gili phaikhali            abu maimu khunmujang

                   Hadam danglainang,

Maising gili phaikhali       jini hakhli majangnang

                   Khamhi nailainang.

Miarong gara thikhabo          ronlai jine mainangthi

                Khalao jonlainang.

Magung gara thikhabo           maising phinne mainangthi

                         Khalao daolainang.

        ************

(In reminiscence of the felicitations recived from various organization)

    Dimaraji

Dimaraji majangha

Phagerani hadamha

       Dangya dangthaothao.

Nodimni sainklimha

Magerani daophangha

      Daoya dao thaothao.

Disogaoni digasain

Hadingmani barsiri

    Maiya maithani.

Nodarangni khamdingma

Dirogonni longphalai

     Khamya kham thaothao.

Jalangma sainkhilim

Maisingha rigudung

        Amiya mai thaothao.

Diharangni Dibaigalai

Hagramani kim majang

    Naiya nai thaothao.

Riyen riyen thirimjang

Jini saoha sorhi dong

   Nini mungmajang.

Khribthane judao denghi

Ningkhe jinthu khilimdu

       Maiphain gatharjang.

Baothai gowar khatharjang

Haba sondu buthujang

  Khayung khadejang

 Lama janakhe phunuri

Thangthaniha sotharri

     Jinkhe buthujang.

*************

   Dongringlai

( K C Bodo)

Magusa nadigol jiring

          Daokhasa gajaothai khonringya

Dikhongsa Dimang kharingya

         Wajensa waima rimringya.

Disogao Digathar lingkhabo

        Magusa khagathar jaringya,

Hadingma khim majang barkhabo

     Khim suding sulaihi gairingya

Saogari majangba majangya

   Jarniba khurmujang maiyaba.

Habasao suliba suliya 

       Jarniba dangthaijang maiyaba.

Gainsari majnagba majangya

         Jarniba ringthaijang maiyaba,

Khasring musiring khamajang

       Jarniba rimphongjang maiyaba.

Hadingma thirilai goiriri

       Barsiri sibaha majangba.

Dirgong khusmaiphang donduru

              Disri phaiba lalire

Khabudi mubudi ganarao

      Jagari majangkhe silingre.

Habasaoha hamba thijaone

           Jathai majangke hadaibare.

Adungrao ajangrao majangrao

       Mudimhi selehi dongjaya,

Mudiru gudiru jadada

           Saingejer thudada laijaya.

Hasaoni khimmajang mithilai

     Sumajang sudada gainringlai

Jagari majangkhe hadailai

   Habesaoha hamhi dongringlai.

Maima Bao.

 ( K C Bodo)

Sainsi rikha thikhade       Giding sainsi maiphinma

         Magna maimab magna thangba,

Dain sain dongdusi       Sampri samphra jamyasi

                      Habesaoni Dara.

Rihi maiya jathaoya       Riya maima baothaoya

               Marsi saojang dongjaya.

Odebani thilandu     maima baokha thikhade

                  Rimakhebo bao.

Dangma jima sleya     magna maima baolaya

                         Buse subung gibi,

Dimalangha thangyakhabo    nokhasaoha biryakho

                     Bose marsi gibi.

Khusi dangya sainjima        khaohi jima thokhima

                     Bude subung niya,

Sainsi khusi hansi dangya     sainjang horjang  sang’gabaima

                     Bude marsi niya.

Subung gibi thikhade      sainsi giri jakhabo

                      Khaohi jiya sainjima,

Sainsi habesao dongkhali   Sukh dukhu ronlaima

                  Sain jibakhe riphinma.

Habesaoha dongbaha      khani dukhu saoni dukhu

                 Saojang bainba dubi,

Bubain risi jakhade   yaowai thailai ronhi bainlai.

                  Bubain rejeng himlai.

Thaire phinsini gakhali      dambra khoroha thangkhali

                    Khribbo saokhali,

Habesaoha dongkhali  rja rijing maibasi

              Hang’gar hakhorsi.

Mai khalibo dasang’ga         maiyakhabo dakhabai

                Khribkhe baosi bao,

Gilim gasa girima   khribjang hamhi donlaima

                    Bukhe bao.

 Yader:

( K C Bodo)

Nini ani thilaibani

                Khasin musin yader

Gaba bibba rikhibaning

        Namu khurmu yader.

Gasao maram jibaning

     Gilim gasa yadedr.

Sang’gmajang thamsining

          Naisley jathai yader .

Khaohi jiba slebaning

          jini jamthai yader

Gilimdi hukhao dangbasi

    Ganang jathai yader.

Gilim gasa wainsomuning

    Hayu laothai yader,

Khaja mini donbasi

      Hayu laothai yader

 Batahi biklim jibaning

      Saoni hamthai yader,

 Saothar khathar jabaning

       Rimphong maithai yader.

Ulma ulsa jabaning

      Saoni hamthai yader.

Saothar khathar jabaning

   Rimphong maithai yader.

 Ulma ulsa donbasi

         Danghi jibani,

Dukhu hadi bangbasi

        Thanghi dongbani.

Hamba yader dongbasijang

     Muli slamlai,

Gilim gasa jakhali

       Yaowai hamlai.

Alaii

( K C Bodo)

Buma buphani khasaothai

    Wari majanglai,

Maising wari guthulai

       Digrikh phin girilai.

Maising dubri di thibsi

      Dithar khaojare,

Jalang dibang digublung

    Yega sujare.

                         (ii)

Luguraoni hamjaothai

          Dibu sorbalai,

Jalang dibang sorbalai

       Maising rainbalai.

Maising garain phaikhabo

            Dilam dajori.

Dibai hamba maikhade

Dibai daslairi.

              (iii)

Khabangraoni hamjaothai

  Hajeng yagainlai,

 Himphalangba gamaba

     Yagain gamalai.

Hajengkhonha himbalai yagain dagmari,

Murusa yagain majanglai

 Yagain thaolangri.

                (iv)

Naga mathlani majangthai

     Khimba rbarbalai

Phorong majang khimbarbalai

          Sainbili rainbalai.

Sainbili rainkha thikhabo

        Bahai dagmari,

Nini bahai midimkhe

         Habsao gablairi.

                    (v)

Danghi jibani jarimin

                   Jalang bothorlai,

Dukhu gomanilamade

      Yungma gabalai.

Jalang dukhu bangkhabo

         Khalao dangjilai,

Yungma galao gakhabo

     Thibgri dadonglai.

              (vi)

Habesaoni gaba bibba

      Sampharang khubalai,

Khuphalangi naiphlanghi

       Bogrong maiyalai.

Gibim gathang jikhabo

           Mrambi sabine,

Lebhi smlai songkhase

       Sampharang thaobine.

                 (vii)

Rahi phuhi maiyaba

        Jini girikhthai,

Khanai gohi grasarao

      Khojong maibalai,

Khanai gohi maikhabo

       Khojong thathilai,

Khanai dongba jalairao

     Rohi majanglai.

   

Thairagai

( K C Bodo)

                 (i)

Nobrajicni majangthai

              Nokhe gasain dengbaha.

Khunangraoni majangthai

             Raji gasain dengbaha.

               (ii)

Gede khase khusihase

         Sengphong jilikh niya

 Rege majang jathaihase

      Saogariha niya.

                  (iii)

Khurili daoniba majangthai

     Digirkh diwari majangthai.

Meyani majangthai kha laothai

    Masainjikh majangba gasainthai.

                       (iv)

Longthai ruba mindaoya

      Bondo songba thaodaoya,

Sang’gayarao ringdaoya

    Sleyarao jadaoya.

               (v)

Garaothaigiri madai huba

           Hojairaoni hogablai.

Baothai giri khusi dangba

 Agorsane hogablai.

             (vi)

Noyam hayam ribatha

      Rimphong riba hamdao.

Rangkhe rikhe ribatha

      Ringthai riba hamdao.

                  (vii)

Mairong monsi maibatha

     Maimu hersi bangdao

Gajao guphu hersitha

 Ringbudise bangdao.

Phagunbadain'ni Yaosandhi : K C Bodo

Gurbili Thani

 (K C Bodo)

Lailangya maithaikhe

     Hamhi digarthani

Maithai gadain hambakhe

  Klimhi longbuthani

                (II)

Ada abi radaobakhe

     Ara khlimthani

Adung Ajang gidibakhe

      Ara khasaothani.

             (III)

Hagong gasain gayaraone

     Abo lenggothani

Dibu galao yuyaraone

     Rungsa phathani

              (IV)

Saoni dukhu hadikhe

      Dugrupphalaithani

 Khani dukhu hadikhe

          Ara phoronthani. 

               (V)

Ganang dukhi khribjang

      Masi jathani,

Jarni gaba naiyahi

             Jini rithani.

               (VI)

Jithai Gathar Jithani

    Hogathar Jathani

 Lingthai Gathar Lingthani

  Khathar jathani.

               (VII)

Lonthai guthu lonthani

        Oisor nuthani

Hadi barsiri phaibaha

      Jini khaisenthani.

               (VIII)

Hamba hamya suthani

     Hamba yawaithani,

Jathai honthai majangrine

     Hamba silinthani.

              (IX)

Lama milin himkhali

     Rimphong maithani,

Dirgong rungsa khamane

          Duyung maithani

                (X)

Thaire phinsisni gakhali

    Lugu maithani,

Damra khorha thangkhabo

 Besai donthani

           (XII)

Aju adai gadani

    Yagain naithani

Thiya muli gaithani

       Danang thaothani

( Panimur: 14/02/87 on the day of holy bath)

             Dakhabai

          ( K C Bodo)

                     (i)

Gubili dirgongni hadingma

        Jiniba haganthi hagara

Langkhalang dibi dimajang

          Naigari Jagari jiniba.

                        (ii)

Hadali gorongkha thikhabo

     Hadingma haguju maodaoya

Digaso goronkhathikhabo

        Langkhlangma dibu songthaoya.

                      (iii)

Honghamya jahamya jabaha

     Khalaoma khasuima jingnangdu

Lonkhade oisorkhe goronnang

   Araha khadema maiphunang.

                       (iv)

Arani digathar hagatharha

   Khabudi riyaba maima dong.

Lonkhade khabudi ning mainang

      Habasaoha hamhi dongphunang.

                          (v)

Wanibo wajora beyeng dong

     Sainnibo saijora basain dong.

Dainphirmi phagub badainni

           Sainjora dainjora dimani.

                     (vi)

Wayengse wakhe raoriba

       Marsise raoriba sainjora

Arani sainjora gatharha

   Dugruhi ning mainang kha raoma.

                    (vii)

Kharaoma khadema dongkhase

     Phagera hadamkhe dangphunang

Khalaoma khasuima dongkhase

Magera riminkhe khonphunang.

                        (viii)

Hayung  Khrasni hatharkha

   Dimasa Dimajic yerdukho,

Hagrongbi Dima rajiha

  Mahuni garaokhe jodukho.

                   (ix)

Dimasa Dimajic dongbasi

   Khim thidu khimsuding dingsini.

Dimasa Dimajic bangbasi

  Na thidu Diwari Khonsni.

                    (x)

Girikha thidada dakhabai

   Yao gabao khamdada dadonglai

Rebkhuba ringkhade dinibo

  Mainangkho mahoni  garaothai.

                   (xi)

Rikhiba ringkhade dinbo

      Phagera thanikhe mainangkho

Smaiba ringkhade dinibo

      Magera gonthaikhe mainangkho.

(Panimur:

18/02/92 on the day of Dimasa Holy Bath))

 Majangnang:

  ( K C Bodo)

             (i)

Hadam bophani haganthi

    Digathai bomani Diganthi

Hadam girini phagiri

      Digathatai girini magiri

                (ii)

Jiniba bophani haganthi

       Diniha jamric jamphaidu,

Jiniba bomani digathai

       Diniha gaoric gaophaidu.

               (iii)

Phagera yagainkhe himbaha

      Habesao hadali jingmaidu,

Mageradigathai naibaha

     Dibasao didali gorondu.

                 (iv)

Lamayung gadainkhe himkhabo

      Lamayung dukhaling debindu,

Digathai dibaikhe naikhabo,

  Mugru naiphuya phihabdu.

                  (v)

Bomani digathai sukhaoya

     Longphalai dirimma milindu,

Adungrao songbaha gasledu

    Ajangrao khambaha khamsledu.

                (vi)

Jahamaya jagelao jamaidu

     Honghamya hong gelao hongmaidu,

Gajaoya digalao gajaodu

     Giphinya waremai giphindu.

                  (vii)

Pharaba sainkhali sa- nuya

         Diniha Dimasa jamphaidu,

Maraba sainkhali sikh-nuya,

Diniha Dimajic thimaidu.

                   (viii)

Jiniba hakhili Dimakhe

     Sibkhaoya saingalao dongbani,

Jabaijang diniha morphaidu

      Gasaojang regejang maramdu.

                      (ix)

Jahamya jabili jingmaidu

   Honghamya hongbili gorongdu,

Maikho maidengba maijamdu

    Rangkho rangdengba rangjamdu.

                        (x)

Thikhabo slehi dongjaya

   Sisajang khamhari khamjaya,

Khasaohi mudiruhi dongjaya,

 Alujang thuhari thujaya.

                        (xi)

Yawai thailai dangkhade

  Lengyaning digathai ragaonang

Buthujang hakhili sibkhade

     Hakhili gomorbo majangnang.

(Panimur: 06/02/93 )

        Rimphong:

      ( K C Bodo)

                  (i)

Boma bopha bada bubi

    Noni nini rimphong

Hagong gajain gakhali

  Ringthai nini rimphong.

              (ii)

Phorikhoha sibringya

    Ansaraoni rimphong

Jadini khusi dangba

   Hoja guru rimphong.

                 (iii)

Lugu bangdao maimane

    Garao gidi rimphong

Gede khiring jagone

    Jathai majang rimphong.

                   (iv)

Dukhu hadi jakhali

      Lugu khathic rimphong,

Gilim gasa jakhali,

   Doctor oisor rimphong.

                  (v)

Nokhe gasain dengmane

     Garao gasain rimphong,

Jadi masi majangne

   Dara hamba rimphong.

                   (vi)

Dibu rungsa jaokhali

       Baitha nini rimphong,

Thaire phinsni gakhali

Oiswar nini rimphong.

.

                 (vii)

Lama milin himmane

  Rimphong hamba nangdu,

Danghi jihi dongsomane

    Rimphong hamba nangdu

               (viii)

Rimphong giri sisongjang

 Hagra yaophuya,

Rimphong giri marsijang

 Lugu khajaya.

           (ix)

Khudiphong giri khudikhe

     Khudi thijaya

Rimphong giri jadikhe

     Jadi thijaya.

         (x)

Lonthai ringya thikhade

 Oiswor nudaoya

Yawai ringya thikhade

Rimphong maidaoya.

           (xi)

Baitha giri rungjaore

  Wari gilikhre

Rimphong giri marsibo

     Sainsi gamare.

Panimur: 15/02/1995 on the day of Holy bath)

Kha-maoya:

 (K C Bodo)

                  (i)

Habasaoha hajaikhade

    Sainsi thima nangmase,

Sainsi maikha thikhade

     Sainsi rima nagmase.

                  (ii)

Khasaomakhe dakhaithi

   Lugu maiyanang,

Maiyabakhebo huidaji

   Gibrim maiyanang.

                (iii)

Jigajaijang jamdaothao

 Ling gajaijang ramdaothao

Jathai majangning thanfdaothao

  Garao gidining didaothao.

                    (iv)

Saojang khajang ragaokhase

   Marsi ragao gibi,

Khasin musin girikhase,

  Marsi majang gibi.

                  (v)

Hagra gara thikhase

 Thongkharao maiphuba,

Wagra hamkh thikhase

  Wa-slo hamphuba.

              (vi)

Mani kharao gede hoja

   Sainsi khasida,

Ringthai guthu ning mainang

 Sainsi dephunang.

              (vii)

Barkhase khim midim midimba

  Dangkhase hadambo laliba,

 Thaiganang bedebse naithaoba,

   Ringkhase marsibo majangba.

                (viii)

Slesa mudimhi ringdaoya

    Dangyahi magna maidaoya,

Ringthai girining jamdaba,

   Yaoblai girining thidaba.

                  (ix)

Subongni birim jathaiha

   Jathai hamnang subong hamnang

Jadini birim daraha

   Dara hamnang jadi hamnang.

                    (x)

Oisor masi sowakhade

     Dimasa khamasi japhunang,

Dar masi yawaikhade

     Dimasa graosi japhunang.

                 (xi)

Yaogejeb dukhaba gubruya

   Thonggejeb noh dangba nohmaoya

Diguthu nayung  na baiba

Lonthai guthuni khamaoya.

(Panimur: 4/02/96 on the day of Holy bath)