HANGSLIKHMA (4)

Diyung Dirgongha

   (K C Bodo)

Mathai rijing raja Jiba

Dilaonarha dongbuba

Malaijangbo lonjaoba

Dimasarao dongne ringya

Jarni nokhe dangkhalaikha

Jarni hakhe sejaokha

Diyung narha thaophaikha.

Haju harang donphaikha

Haphai hamba jini raji

Dini jakha malaini raji

Malai ringkha girikhkha

Jing gibir thaolakha

Dini malai maijidu

Jing rainghi dongmaidu.

********

Nolai masiha thiyasi

Dinibo dongma baoyakho

Noma thonkharao gaiyakho

Dimasani thonkharaojang

Malai thongkharao gailadu

Diyungnarni Dimasarao

Nolai hamsi khayakho

Bari khaba jenyakho

Thaiju thaiphulung gaiyakho.

Maithai phindu jaibaidu

Dimasaro gamadu

*******

Diyungbrani lisgrini

Thongaphangbo gabaodu

Hading jangse khorongkhaba

Malai nuhi gamangba.

Hariphajang harimba

Diyung dirgong khundangba

Diyung dirgong mailuba

Gamariphanag rungdainba

Dusampharaijang sikhlaiba.

Diyung dibu rung jaoba

Baithasa muthimji

Yaoha giliba.

Diyung dibu rungjaone

Jaoring daojang haripha

Dini bara thanglakha?

Garao Dima rijabne

Harimakhe nuyakha.

Diyung Dirgong Wathibondo

Sainsi baiya rijing rijing

Daindu malai masaidu

Malai bajiha langladu

Rangkho rikho bojaidu

Diyung dibu garadu.

Diyungbraha yaokharai dangkha

Lama jaokha no dangkha

Makhao mithim gablaikha

Dimaraji luphibkha.

Liz girini garaothai

Jaoring daoni rijabthai

Dini rikhi maiyakha

Dimasarao gamakha.

Dimasarao baburao

Jadi nangya mulukh nangya

Laisigurse nangjaoba.

Laisi gurjang bongphangjang

Dini salai jilaidu

Aphnaraokhe dangklaihi

Burung khasi bittle gajao

Jujang thiyung jaoridu

Dirgong mogong saoridu.

Counchilne ribatha bangdaohi

Makahaorao phongphaosi jiladu

Dimasarao gejesi

Hagong danghi Jiyarao

Hading ragai dongyarao

Naikhu rainpha dongladu

Sain raonang ha raonang

Hadi hanang bel bel

Sam barma bophrijang

Dubri yader bithibjang

Hadunang duphuya

Sam phinang phiphuya

Sainsong danghi maijiya

Horsong daohi main gainya

Dimasarao japhaidu

 ******

Dini malai bangphaidu

Longlai makhe jikhphadu

Lamsakhongkhe jikhphadu

Nolai rijing dimasarao

Diyung dirgong dongbakhe

Dini balaodu.

Dimasani jarimin

Gamarikh gamadu.

Lizgirijang jaoringdao

Laosadaojang longbangdao

Hariphajang harimani

Bisai barja birbaidu

Mudi Diyung Gajaodu.

Dimasarao nailaiya

Dimajikhrao smaiya

Ringyaraobo rebkhuya

Yader Dima gukhurdu

Jing gibir thijaodu

********

Digejer longthaima dongkhali

Diyungma Dibaola dekhabo

Digejer longthaisa maoyamu

Digejer longthaima girikha

Diniha malai dokhribkha

Disri disra phaikhaning

Digejer longthaisa gajaodu

Diyung dirgong Dimasarao

Jamdao Jamdao jamphaidu

Diyung dibu Diraindu

Na gune wari giri

Bon daingne bonphang giri

Diyung dirgong hajengkhong

Khusong bidi Diyakha.

Diyung Dibu longthailing

Sisong hone maiyakha

Dini Jarikh Japhaidu

Bokhe Nuhi Khabaidu.

HANGSLIKHMA (3)

DIJEN DIRGONGHA

   (K C Bodo)

Dijen dirgong mibangba

Aju abai mirikba

Dijen dibu nabangba

Adai amai narimba

Gari jaoya pharainba

Rimi rimi wainsoba.

Namu khurmu jalaihi

Afna hainthi degaolaihi

Hawar raji hagarhi

Tularambo phailaba.

Gobin Chandra Dimaraja

Munglaijickhe maibani

Munglaisajang daingjaoba

Hawar raji malailangkha

Dima raji singli jokha

Tularamni madaikho

Mahamaya hajuha

Sibrai madai smaihi

Mahamaya thiphalakha.

Dimasani sibrai daikho

Dini malai yaowaikha

Tularamni Dimaraji

Dini jakha phanaraji

Kardom Thiba khanadu

Juthai Thiba khanaya

Tularamni kamanbo

Gama gumu jatharkha.

Daoga hajic doboga

Dijen jakha jamuna

Bangalini haoragath

Rukhmini gojaligath

Dijen narha sophaikha

Aju adai dongyaba

Dijen narni nolai dima

Dini bumu girikha.

Tularamni hathan majang

Raja hadi rajaphathar

Thiri hadao sonphura

Dini bumu salaikha-

Dimaraji giphibkha.

Jiba lingba gajaihi

Jabli jathai gablaihi

Haju harang birphulungkha

Haphlai Didab giphibkha.

Jiba lingba gojaihi

Jabli jathai gablaihi

Haju harang birphulungkha

Haphlai didab giphipkha

Dimaraji gamakha.

Dijennarni longthai gara

Dimasarao nuba ringya

Malai khurhi bainlangkha

Dijen dirgongkhanlai dima

Dimasarao khamne ringya

Malai sehi khamlakha.

Dini khamphalai nangjaodu

Maiya naikho thaoladu

Dijen dirgong Mijamkha

Dijen  Dibu najamkha

Hagong mirikh sainkhamkha

Dikhong narim nasaoji

Olai dini japhaidu.

Dimasarao Jibai naidu

Maijiya thaoladu

Khusungsarao dibai naidu

Wariha libhi dongladu

*********

Dijen narni Dimasarao

Ju lingdu himjaidu

Bokro bithlim gududu

Nokhorsijang namu jadu

Buphani noyam phainjidu

Bomani kharnai luphibdu

Malai naihi minidu.

Dijen narni dimajicrao

Daophang khamya bonphang-gadu

Rigu gainya sari gaindu

Dimajicthi malaithi

Goronbaha tharmaiya

Dijen dirgong songdada

Naiding naidang naikhabo

Abi thine giridu

Ajang thine  maiyadu.

Dijen dirgong khamdada

Yaopha khaolai rimdada

Khadukhujang naikhalaihi

Muthai Mudi Larangdu

Jirikhaohi Garama mijingdu.

DIMA DIRGONGHA

   (K C Bodo)

Dima dirgong dimakhor

Dinibo nojom masi dongkho

Dima dibu donsri jakha

Derga dibu darugajan

Dimapurni raja nokho

 Dini jakha malaini khikho

Dimanarni Dimasarao

Bophani bumu mathaophuya

Jarni bari khadingphuya

Bomani kharnai nailaiphuya

Bogorongha rilamne mosojamkha

Bokhroha risune naphi jamkha

Khundijang khunbarba khun dangya

Phanthaophang gabaodo girikha

Dini malai gablaikha.

Tularamne raja hadi

Hathan hamba phunuphuya

Dima huj phralungni

Basa bara thanglakha?

Bopha hangma sikhmaidu

Boma hangslikh garadu

Dima dirgongha khamkhade

Rimi rimi khanadu

Khaju gili khabaidu.

Dima dirgong nagarao

Goronkhaning baolarao

Babu jadu lebbaidu.

Nogorong khine daono giri

Mai lamne maigiri

Noha thidu salingya

Malaini khudi gundikhe

Hotelhade linghaya

Jathai basao jathai maidu

Limthai hamya limthai maidu

Boma khaba rikhatho

Bisic khuru khaolangdu

Bopha dengba rangkhatho

Basa subru sojamdu

Jarni hotel slamya

Malainede rihaya.

Magusane rongtebridu

Jiblai bakhaolai rijaodu

Sisanse khamplai ridu

Jarni khamphai sejaodu.

Dima dirgong dimasarao

Ju lingdu mogong jidu

Jaro noro jalangdu

Dimasarao gamadu.

Dimanarni mathlarao

Dimasakhe majangjaoya

Malaijangse khaiphlangdu

Dimanarni nagarao

Dimajickhe khanagya

Malaijangse no jadu

Thuruthibo magamthibo

Donthai malang jithai malang

Nosing nomang badim giri

Jadi malai sin giri

Yader boso od giri

Baryung phaine nangdaoya

Diyung dene nangdaoya

Barsra sibkha thikhaning

Dimasarao giphindu

Disri disra phaikhani

Dimajicrao gajaodu

Garao dima ringyadu

Dimasarao Gamadu.

HANGSLIKHMA

HANGSLIKMA

( A collections of Dimasa poem written by K C Bodo)

Published in 1984

GARAO DIMA

   (K C Bodo)

Garao dima ganangmu

Disruni garathaijang

Harimani khabaithaijang

Johayani rijabthaijang

Romanphani Bisarjang

Dilao Dihong Disang Dikhrong

Dima diyung  jathinga

Dimu rijing dimu dijang

Kharmin rijing kharminjang

Mahoni garao ganangmu.

****

Garao Dima bumu hambi

Maiju baireng maibathai

Thaphle thakholong thathisa

Thagdi gidi thaphugajao

Manglai dima manglaimaiju

Jiba athalai sojabdu

*************

Bumu hamba thikhabo

Bumu rijing dongkhabo

Dimasarao dengba ringya

Dimajicrao gaiba ringya

Maimu dengthan nokhim giri

Hadi hadu di serdu

Maithib maimu saophadu

Maimu muri gabla giji

Hakhor mojo lalngladu

Garao Dima Gamadu.

Maimu donghi mai giri

Hadam donghi makham giri

Malaini maimujang maidangdu

Malaini khudijang hadudu

Rangkho rikho jamladu.

Dimajicrao nana bahi

Dimasarao bede bahi

Haju harang graimaidu

Haphalai gajain himmaidu.

Malaini buminjang daobani

Daoyajicne ribidin

Malaini buminjang hobani

Hoyajikhne yambidin

Diniha dimasa jamaidu.

Dimasarao makham songdu

Maikhu mai jidu.

************

Malai hagra yaotharkha

Hasa sibkha, bongra bokha

Hadam guphu maimu gisim

Malai dini danglaikha.

Malaini phadain majangha

Bathai biklim gablaikha

Malaini bariha diniha

Khim barkha majnagkha

Bahai midim gablaikha.

Dimasarao dinibo

Hagra bongra yaoyakho

Jarni hadam jenyakho

Bumu dima gaiyakho

Basikh thuhi laibani

Basa yao gabao dongbani

Buma garajikh garadu.

**********

Dini jini khusi bangkha

Khusi yader jenma nangkha

Bumakhe pholama galaikha

Niyakhade pap nangma.

Bondeb gogoi daindada

Nangol sima moi khama

Maijubukhe jaokhalaihi

Sadowakhe saikhlaihi

Maisa garma, mai gaima

Hasa sibma bongra boma

Ha saoma  ha khonma

Maimu saima haduma

Khunmu saima haduma

Khunmu saima khunduma

Lugu yawai thailaihi

Hangseo surem manaohi

Bumu dima gailaima.

Sam phima derima

Sewa boma jurima

Garaodima slamma

Garao dima phurima

Basa dongba jagaoba

Basa dangba maijiba

Bisic daoba maingainkha

Laisi laibra ringklikha

Basa bisikh kharangkhamaya

Jini buma dimajikh

Olai baohi khajalama.