Maimu ; K C Bodo

SANGMAJANG

( K C Bodo)

Rdaolaijang phamibar

        Khundi ode thairubar

             Yamthai ginini khimmajang,

Dilam roina phanthaobar

   Bathorimai gainsongbar

            Ridimani khim’majang.

Dimasani yamthaigili

          Disingbaha busuha

                  Khamya khamthaothao,

Dimajicni ribumin

           Baiba lama himbaha

                    Naiya nai thaothao.

Pharaphang saoha daorijing

         Pharaphang khalaha mirijing

                       Jalangmani gisibsa,

Thairesaoha saokhade

       Damra khoroha maiyaba

                   Thuriminni ribasa.

Gejer guphu gejer gisim

        Midisujang rebyaba

                   Jini kharimin,

Yaosi sabaithai majang’jang

       Dimajicrao rebyaba

                   Jini jarimin.

Dangba jiba daoba gainba

      Malaikhe nangya suliba

                     Abu ja majang

Phaganangni seng’ganang

     Maganangni neganang

              Abu sang majang.

#############

 Khaspur:

( K C Bodo)

Dimaraji jamsobani

        Ning ning saogari

Namu khurmu jabani

        Ning ning mang’gari.

Dimaraji gilikhbani

       Ning ning thaigari,

Gaiba lai lai thaibani

       Ning ning thaigari.

Jarni birim gamabani

  Ning ning daogari,

Songkhuhibo galaibani

         Ning ning jagari.

Rimphong Dima giphinbani

         Ning ning jarimin,

Malaikhe labu dengphaibani

         Ning ning dongrimin.

Maijikhase mailingkhase

     Malaide hamjaoba,

Haro noro japhaibani

       Ningkhe jikhphaba.

Ninibo dangjai dongnaiba

       Alai jamaiba

Brindabon’ni thaijiba

    Garangha sagaiba.

Hojom jaya hothangba

       Liumthai mailaba,

Thong gabaone dongkhabo

          Mang gabaone giriba.

Nini hakhili majangkhe

         Mangkhlong khalaitharkha,

Ningde mudi rubaha

             Malaide minikha.

Malaini dara yawaikha

           Jarni gamakha.

Susaringya salaiya

       Jarni jamtharkha.

Sainha andhir japhaikha

     Lama gama’makha,

Sainjang horjang smaihibo

        Bomakhe nuyakha.

Baitha giri rung jaokha

        Mothurakhe gajaokha

Gakhudaoma naibaha

        Gilikhsni gilikhkha.

Dimasani khabaithai

     Nini nogabai

Dimajicni mudithai

       Nini dikharnai.

**************

                                                 Dimlang:

( K C Bodo)

Dimlangde majang bimu                  Dimlang rungma gathaobi

                             Dise lingba suliya

                                  Smlai barabbi.

Dimlanghade naithaobimu                sainjang horjang dongthaobi

                                 Gilikhkhase thiphuya

                                   Barkhon dithon bangbi.

Dimlang majang naihimane             loguraode longhadu

               Nogorong thaokhi garyakho

                   Hakhli gomor sibyakho.

Abai garasa himphuya              amai garajic maophuya

                 Nokhim giji labyakho

                Badim gabla phungyakho.

Danangni garaode danangha         Dimalang majang naimane

                          Dinide baigoba jayakho

                           Nodimakhe naimakho.

Rungma jaoma thikhade        rungsa jaoba slingda

                           Riyaobakhe ringlada

                           Rungsa dima jaoringda.

Nokhasao birma baokhabo       hadingma ragaiba slingdA

                           Nodima dangba ringlada

                              Noju  Dima garingda.

Dathang lugurao dathangkho            Dima Dibuha jaomane

                              Rungsa sohi galangkho

                               Baitha sohi rilangkho.

Dathangkho Dimlangha dathangkho        danang phaiphin dongmane

                        Nokhim giji lablangkho

                       Badim gabla phunglangkho.

Dathangkho logurao dathangkho         khaisa yahon naiphinha

                           Bophani khorngyam khalangkho

                           Bari giji phunglangkho.

Nisikhe gasoma ang thiya          bomani daophang gailangkho

                        Bahandao ridima daomane

                        Rashiphong thuri dainlangkho.